今日下午相約了客人到呢間位於文化中心被雜誌譽為型格潮餐廳的Deli and Wine睇牌, 這舊址是Starbuk, 如果你唔係黎開文化中心睇表演, 你都唔會走過來呢邊, 所以我之前成日都係呢間Starbuck 度睇牌, 貪佢夠舒服同夠靜….
及後裝修了就變成呢間Deli and Wine !
我約客人多數都喜歡早過客人15分鐘到達, 因為我很怕趕頭趕命的感覺!
所以今日特地早點出來約了在中港城做野的C 先生黎呢度試下新野!真係一石二鳥!!
都唔駛入去都知道呢個地方係一個好hea 的地方, 點解咁講呀!? 你睇下門口o個兩位仁兄你咪知囉!
門口有塊版介紹每日的推介食物, 不過唔係用粉筆同用手寫, 而係印好哂係塊版度!
如果每日都有唔同的推介的話, 咁咪要成七塊版囉!?
餐牌就大大塊掛響一入門口的當眼處, 有四,五大類食物, 有意粉, 咖喱, 湯麵, 撈麵, 飯類, 餐牌雖然好似好簡單咁, 但係都已經可以搵到好多野係想食, 咁即係證明呢間野超岩食!
門口的每日推介牌原來真係有佢的作用, 因為我地睇完呢塊大餐牌後, 居然以為門口o個個係一個套餐餐牌, 所以又碌左出去再睇!
點知其實就係俾佢昆左!
出面個牌都只係同入面o個個一模一樣, 原來睇真D, 要轉餐咪好清楚咁寫左話要加錢!
於是我就先去搵位, P先生就去收銀處買野食, 下午時候太約八成滿, 一搵就搵到位, 我真係覺得自己係一個幸運的人!
每張檯的檯上擺設都唔同, 有D有又有D冇, 咁岩我呢張就係一棵小樹呀!
張檯型就型喇! 不過略嫌係矮左D, 我地都要寒哂背咁去食野囉!
我地叫左兩個餐share ~ 先來就是魚柳包拼炸薯條, 盛惠$38
麥當當的魚柳包不嬲給我的印象都係冇咩魚味,但係去第二間快餐食魚柳包的時候成日都會覺得好鬼腥, 呢舊魚的味道真係恰到好處,肉質鮮味,脆粉薄薄而炸得香脆!
另外薯條香脆無比,仲要係即炸辣辣!!
我個人都係喜歡食粗薯條,最好仲要係有薯皮o個隻!
呢張相真係映得都幾差勁,唔知個focus 去左邊,個角度真係錯哂呢!
另外就叫左個菇菇意, 其實呢碟意粉的感覺係有丁點的奇怪,因為菇菇的烹調方法很中式(有濃濃的蠔油味), 汁就是用日式(照燒汁), 意粉就唔駛講係西式, 真係黎左一個大聯盟意粉, 三十多元,不過不失呀!
再呷一口有拉花圖案的Mocha, 真係令幸福感滿瀉, 係人都鍾意靚野,所以加點點心思,提升一下食物的賣相,真係人都會開心D 呀!
看仲呢個鹿形的裝飾, 唔知點解很有泰國的design FEEL~唔知佢係唔係黎先泰國架呢?
走到另一邊的corner 位, 居然有一個小小的書架!!! 令優閒的感覺再飊升了十倍!
黎左一個速望,我諗其實這些書的作用都係用黎裝飾下,提高一下品味~
除了有餐牌上的主食外,仲特設開到泛濫左的乳酪corner, 這些圖文並茂的餐牌, 我諗我都係一個圖像人
不要誤會,不是自助的,我只係映下~
Topping 有大約二十款俾你揀, 十款係生果, 雖然佢冇我最鍾意食的餅乾碎(正確黎講係麥維他碎!) 不過我都決定一間睇完牌後買一杯獎勵一下自己!
因為岩岩食完飯即刻食都真係食唔落喇!
唔駛我多講, 你睇下個比數就知呢間野值得一去啦!
