很久都沒有寫blog 了…已決定從新開始, 好好再投入!!
幾時和朋友去外, 嘻嘻哈哈是最令人放鬆和開心的事!
今次我們終於都識放棄去食西餐,轉戰可能嘈到拆天都冇人話的打邊爐, 真係唔可以睇少女人墟的威力! 我這班朋友一行四人(包括我), 笑起上黎的分貝一定係環保處超標!
哈哈哈! 食西餐俾人用歧視的眼光都已見怪不怪, 最勁的那次係茶餐廳都俾阿姐叫我地細聲d, 冇錯! 係茶餐廳!!真係誇~ 嘩哈哈!
有見及此,今次我地就黎尖沙咀山林道的高流沙打邊爐!
![](https://blog.yimg.com/3/evtEdI57s5.FqWSVHaxSS.rjTdT6fYVlGIJ1_oqbG2Pnuu4RcPTuXg--/84/l/pMLADIonFsAjoCLghnCtQg.jpg)
入坐時七點多已全院滿座,不過老實講檯就唔算多,得三四張大檯加十幾張細檯,要食一定要早幾日定位!
![](https://blog.yimg.com/3/evtEdI57s5.FqWSVHaxSS.rjTdT6fYVlGIJ1_oqbG2Pnuu4RcPTuXg--/81/l/dPDOMuUZ48HRaU_JyyT43g.jpg)
調味料一盤九款,有沙茶醬,炸蒜,辣椒。。。你要o既都應該有!
![](https://blog.yimg.com/3/evtEdI57s5.FqWSVHaxSS.rjTdT6fYVlGIJ1_oqbG2Pnuu4RcPTuXg--/90/l/V.Ygd7z5gtiqbBeWk4DX3Q.jpg)
打邊爐必備的竹蔗茅根水用黎減低熱氣度,一流!
其實熱氣係黎自於一滾完就放入口,所以另外一個小秘技就是要"嘆一嘆"先食!
![](https://blog.yimg.com/3/evtEdI57s5.FqWSVHaxSS.rjTdT6fYVlGIJ1_oqbG2Pnuu4RcPTuXg--/72/l/wjU68ajK1l5ypdYSV4VphA.jpg)
主角湯底海鮮窩出場,$138 勁足料,有蝦,有花甲,蠔,蟹,咁當然緊係每樣兩三件啦!但都足以滾到個湯超甜!
![](https://blog.yimg.com/3/evtEdI57s5.FqWSVHaxSS.rjTdT6fYVlGIJ1_oqbG2Pnuu4RcPTuXg--/77/l/fVAV7ItrGxkyufE.XPC9UQ.jpg)
呢味滑滑三寶($88) 就有蝦膠,墨魚膠,同埋鯪魚肉,唔好睇佢映出黎好似好大條咁
![](https://blog.yimg.com/3/evtEdI57s5.FqWSVHaxSS.rjTdT6fYVlGIJ1_oqbG2Pnuu4RcPTuXg--/74/l/Oy8bWrVn9xpqQPz7o_6iFA.jpg)
唔駛三分鐘我就放哂落去,每款都係得六小粒!
![](https://blog.yimg.com/3/evtEdI57s5.FqWSVHaxSS.rjTdT6fYVlGIJ1_oqbG2Pnuu4RcPTuXg--/78/l/.Y.dX4J1ct6p0cEIODDVNg.jpg)
雖然我知係唔抵,不過我都係要叫炸魚皮($38),只須輕輕係湯灼一灼,仲脆的時候就要即食!
![](https://blog.yimg.com/3/evtEdI57s5.FqWSVHaxSS.rjTdT6fYVlGIJ1_oqbG2Pnuu4RcPTuXg--/80/l/3iAYw4iNQLM8hN3mfaMRYg.jpg)
一碟十隻花甲王($88), 一啖放入口,超鮮甜!
![](https://blog.yimg.com/3/evtEdI57s5.FqWSVHaxSS.rjTdT6fYVlGIJ1_oqbG2Pnuu4RcPTuXg--/76/l/8a.JPixdgzPKLMTBqKvGqA.jpg)
呢碟就係友人推介必食的魚三角,其實就係魚骹,一條魚就只有一舊,所以一碟五件都要買$78, 但係魚肉的嫩滑度是你不能想像的!友人及後想再Encore 都已宣佈售罄了!
![](https://blog.yimg.com/3/evtEdI57s5.FqWSVHaxSS.rjTdT6fYVlGIJ1_oqbG2Pnuu4RcPTuXg--/79/l/IJCRkJXFesvjcFSPsH8vqA.jpg)
再來就是墨魚丸及魚鰾,鮮打墨魚丸的食法當然就緊係唔同一般製好的!鮮打的爽口度同鮮味度真係達到一百!
魚鰾的感覺就一般,左不多食完的時候,友人B突然問放唔放埋些豬皮落去,Oh my GOD~原來佢一路都以為自己食豬皮!
![](https://blog.yimg.com/3/evtEdI57s5.FqWSVHaxSS.rjTdT6fYVlGIJ1_oqbG2Pnuu4RcPTuXg--/73/l/iKrp.diPJmNqaP9EMvl4sA.jpg)
呢碟牛冧肉真係千呼萬喚始出來~
由一開始落單,足足等了差不多兩個鐘!
唔知是否已很飽,牛肉比較失色,味好騷,唔夠油,很一般
![](https://blog.yimg.com/3/evtEdI57s5.FqWSVHaxSS.rjTdT6fYVlGIJ1_oqbG2Pnuu4RcPTuXg--/75/l/J36s_r_SWwvezy9XKG3Jvw.jpg)
最後來一個壓軸好戲,就是呢個鎮店的冰鎮魷魚鬚!
從未諗過魷魚鬚可以咁爽脆!於是我一個人係好飽的情況下都食左半碟!
![](https://blog.yimg.com/3/evtEdI57s5.FqWSVHaxSS.rjTdT6fYVlGIJ1_oqbG2Pnuu4RcPTuXg--/71/l/Lfc0N76VswCtA6u8wLxcAw.jpg)
真開心,嘻嘻哈哈的一晚!