by 王姬 

Sweet Diary 10 – 養顏孖寶 @ 旺角

7 7 月, 2011 in 我愛甜品, 全部分類

0 shares

終於呢個Sweet Diary 話咁快就寫到去第十篇, 為慶祝呢個十篇紀念誌, 就梗係要搵番一些未寫過的野寫下啦!

寫咁耐都未寫過中式甜品, 於是就決定將我呢個Best Kept Secret 同大家分享呀!

要經常保持皮膚好似剝殼雞蛋咁滑, 做MASK

係一定要之外, 多吃燉奶真係其中一個妙方, 有冇跟據!?

我可以大聲咁答你:

唔知BOR~~~哈哈!

第一次邂逅呢間海記係o係佢係土瓜灣的總店, 當時真的一試愛上!!!

及後某次路經太子, 居然係呢個鬧市中再次見到佢! 於是好自然我久唔久路過都會俾佢吸入去!

叫得做海記的合桃坊, 佢的咩胡咩胡一定係佢的賣點! 每一日佢都會有一個牌係門口做特價野, 是日的特價就是補腰養顏腰果胡, 聽個名都知有料到啦!

腰果可以補腰!?

唔通真係以型補型!?

除了呢個腰果胡外, 主打仲有呢個合桃同芝麻, 患有呢個金魚健忘症的我

, 耐唔耐都要幫襯呢個補腦的合桃胡要補補佢!

店子小小, 大約可坐四十幾人, 你唔好睇佢好似咁吉咁, 一入夜到左甜品時段, 就爆哂要等位呀! 所以如果唔係相約左我的好友, 我多數就會揀平日下午黎食一個甜品做我的Lunch ~

雖然只得兩間, 但係店員都穿上有logo的制服, 即刻俾人一個很整齊的感覺!

講左咁耐, 係時候介紹海記入面的我的最愛, 就係呢個芝麻燉奶喇! 每次黎親我大多會食呢個!

聰明的你當然唔會誤會成碗野得那一點芝麻胡…….

一篤落去, 芝麻胡就好似心太軟入面的朱古力咁湧哂出黎! 對於唔飲奶的我, 多食呢個, 令我由超擔心老左有骨質疏鬆可改為好擔心, 個心理都得以平衡番下!

另外多食呢個芝麻胡又可以烏髮,滑大腸, 食一碗都只係$22, 滿足到你身體的三個願望, 真係超抵!

由於是日真係熱到冇朋友, 所以明知食凍野唔好, 我都頂唔順要叫一碗凍食

一食, 就決定下次幾熱都好, 都要叫

因為熱食個燉奶滑好多!!都不單止, 仲要係奶味香濃得多, 唔知係唔係雪耐左D, 個面變左阿婆塊面咁, 都真係當堂減輕左食的意慾

很多中式甜品都係有呢個特性, 一凍食個味就要起碼扣佢三成分!

以前會很喜歡食呢個石磨坊的芝麻胡, 不過早陣子開始發覺品質下降左, 似係開粉, 變得唔好味!

自從發現左呢個, 我就即時轉左軚喇! 因為一食就知道呢個芝麻胡真係磨的, 稀杰度適中, 味道濃郁不太甜, 加埋香甜的燉奶, 甜度剛剛好! 

係旺區只做中式甜品的話, 競爭力就不其然會弱一點, 我諗海記都深明此道理, 先有一個signature 的胡類甜品, 等人諗起食胡就搵佢, 但同場加映就是一些大熱天時真係少不了的咩冰咩撈七彩顏色的甜品, 幾個人總係有人要食中式, 又有人要食西式, 所以就可以滿足哂佢地的願望喇!

所以走前兩步的大良八記都係一模一樣, 不過望落去西式野好似就冇海記做得咁好喇!

自問係一個甜食專家, 但係咁耐都真係未吃過呢個桑寄生連子蛋茶, 因為一入到去間甜品, 好自然就會叫自己鍾意食的野! 所以某年某月真係要試一下! 佢呢度仲話係必食!真係巴閉!

地址: 太子西洋菜南街232號

電話:2399 7937

 「幸福的十個理由」現已推出 

免費下載

讓你幸福的十個理由
>