Home / 女神 . 遊歷世界 / 除了水上樂園還有馬戲團的長隆之旅 (特集 二) – 長隆馬戲團

除了水上樂園還有馬戲團的長隆之旅 (特集 二) – 長隆馬戲團

(上文提要就是介紹我們的雙人住宿高級陽台泳池景套房)

今次決定要一口氣出哂呢個長隆特輯, 因為實在係太多美好的回憶喇!

Hea了一陣, 來了一個小醫肚, 大約7點鐘,我們就出發行去大馬戲的會場, 請留意,個馬戲是八點鐘先開始, 咁早去就緊係要霸定個好位啦! 你知啦! 特別係o係大隆呢個地方呀!

對上次現場睇馬戲, 都是N年前老豆帶我去睇莫斯科馬戲團,先不先係點都係零印象,只係記得好開心! (有時我會諗, 其實一個人的記憶最多可以記番起幾多歲時候發生過的野!? 我自己就係五歲, 之前的咩都唔記得.. 飛得太遠, 搵次再寫下先!)

全程太約要行五至十分鐘, 要穿過酒店出去

我地的決定七點是沒有錯的, 未到都已經見到成群人喇!!

有一個大大的廣告牌歡迎你!!但係播埋D同馬戲都冇關係的片

來到長隆國際大馬戲!! 真的十個期待

通道都分了幾條隊, 有長隆酒店住客, 檢票通道, 長隆俱樂部會員優先通道, 話就話什麼優先通道, 其實都係一樣咁多人! 排名次序都不分先後咁囉!

我地就好遵守規則排第3啦! 不過咩證都冇出示過,所以都是形同虛設(暗車中…)

行左差唔多3分鐘, 終於都見到個大帳幕喇!!

幾個入口都設有小賣部, 閒閒地一隻熱狗要人仔25蚊, 好彩已小醫肚

黎到呢個moment 個住戶證終於都可以發揮佢的用途喇!!!

就是可以坐o係較前的位置(台的第一個zone) 同山頂的朋友打招呼喇!!

唔好以為我地好早, 我地七點三去到, 都要坐前排的靠右位置喇!!

好彩當日都未算太熱, 冇冷氣其實真係好難頂, 你試想下,又迫又熱, 整個會場充斥著汗味混合動物味, 第二日頭條日報就會刊登首宗因天氣悶熱,中女慘在馬戲團內焗死的報導了!!

台上的銀幕不停都播出一些片段, 我們談天說地, 好不容易就過了半個鐘, 到了七點四十五分, 就有小小的表演開始了!

八時正就準時開始了!!

這就是長隆的吉祥物 – 白老虎先生喇!! (個名係我幫佢改的! )

千祈唔好誤會, 唔係燈光的效果, 而係空中飛人的表演!!

講明係馬戲團,緊係要有動物啦, 因為個場太黑, 所以都唔係映到好多相 (實情其實只係我掛住睇, 唔想錯過每一刻)

冇相睇都可以講下的, 有大象, 獅子,老虎 (呢D一定都唔少得呀!), 河馬, 熊熊, 猩猩, 忽忽 (其實唔知點猩猩同忽忽係點分, 鸚鵡, 馬馬, 長頸鹿, 有一part 仲有企鵝添呀! 你一定會諗,咁熱佢地點養呢!

所以………

咪出現左人扮的企鵝囉! (呵呵!)

仲有白鷺

同埋月亮 (仲要係八月十五o個)

每次轉景時都會安排一些節目在走廊上演出, 吸引你的視線,岩岩睇完個場景就準備好! 真的是安排得太好!!

成個表演個半鐘, 有空中飛人,女人馬上表演, 小熊拉車, 無騎師排馬陣操, 人扮企鵝跳水, 空中吊環…… 大約有十多個表演,, 絕冇冷場, 表演者好快就在歡呼聲下謝幕!

當中有個表演真的看到我心膽俱烈, 一定要和你地分享! (可惜我又忘了映相)

呢個馬戲的俾佢百二個好睇!!

及後看到poster, 當然要補映番啦!!

最開心就係俾我見到個角落頭!!!!!

真係黃天不負人心人!! 

這就是我睇到出哂汗的五人肉圈(又係我作的個名)

有咩咁驚? 個圈其實是靠中間o個姐姐不停係圈內行, 帶動整個圈不停轉, 留意下紅色衫位人兄, 冇錯, 佢係個圈外行, 整個輪約高三層, total 仲要有四個人兄在冇wire的情況下, 不停係個圈外行

其中有個人兄特別激, 好多次睇住佢差D 仆倒撻落黎, 越想仆佢又仲好似拍左野咁越興奮, 表演越激! 又跳繩, 又黑布蒙頭, 又跳舞咁樣…我忍唔住驚呼左幾次!!睇到我都唔係好想睇落去

真係好想大叫同呢位人兄講, Excuse me! 我心血好少, 我真係唔想睇住你撻死, 你真係多左D喇!

好彩咩事都冇發生, 如果唔係都唔知點算! 即場停止表演定係繼續呢??如停止,咁點回水呢?唔回水,擇日從賽又點安排呢?所以。。。真係好複雜!

不過又咁講,佢的確帶來了一個整晚其中一個高潮位o既!!

M 先生都忍唔住笑我,佢話睇我個緊張樣仲好睇(huh!?) 佢話o個個人行圈多過我地行路,都係扮下野嚇下觀眾,不過佢都補左句,有時意外又真係好難講o既!

(及後我同一個客講起,佢都話個人兄扮下野啫,咁睇黎自問精靈的我都係入世未深,俾佢的精湛演技呃左了!)

2,442 total views, 4 views today

About 王姬

Paul Li 說道:

好似剛開幕我來過一次!  
[版主回覆05/20/2011 23:24:00]我諗同依家的都差唔多~不過中間可能有少少野改過
哈哈~~~可能咁你睇o個時o個位嚇死我的人兄都已經o係度表演架喇!!

YouU 說道:

個企缸道門..頂住自己出番黎喎
大陸設計真係….
[版主回覆05/19/2011 22:54:00]咪係囉, 都唔知想點~~~

YouU 說道:

越精彩就越少相呢
 
[版主回覆05/19/2011 22:53:00]係呀~你都唔知如果要映相真係好鬼"呢"hea, 加上又黑"蚊蚊, 較到好高ISO又手震, 都唔知映左D咩, 把鬼火都係唔映, 免得錯過左
好彩又俾的映番個圖呀!! 如果唔係我點形容你都唔會好明我講的有幾咁嚇破膽!!真係諗起都心寒!!

Scroll To Top