Home / 女神 . 港飲港食 / 米芝蓮二星餐廳 – 朗豪酒店明閣

米芝蓮二星餐廳 – 朗豪酒店明閣

岩岩星期五, M先生神神秘秘咁帶的去朗豪坊, 又從施故技問我要食咩, 我真係一時之間都唔係幾諗到, 於是提議邊行邊諗, 去到朗豪酒店的天橋入口, 佢話去一下Toilet, 我跟住佢, 就黎到我想食好耐的明閣喇!!!!

原來佢一早訂左檯, 帶我黎食!!!!因為我講左幾次,好想試佢地的招牌菜千層松露豆腐

真係要多謝佢的悉心的安排呀!!

是夜全場爆滿,唔知點解著咁一半都係老外架呢?佢地真係識搵食~

連餐具都靚過人,個pattern 真係夠高貴典雅呀!

餐牌都係一般Classical 的黑色硬皮餐牌

睇下個餐牌,就見到傳說中的金箔松露千層豆腐,都只係$45一客!!

又金箔,又松露,仲要係千層!!都唔係計有金箔同松露,淨係擔心機錢都值回票價啦!!

終於都隆重登場喇!!!薄到好似3mm咁薄,個圓周好似時時食咁大~(係唔係呢?定係再大D呢?不過可以肯定一定唔會係好似嘉頓薄餅咁大呀!)

我戰戰兢兢用匙羹劏開佢!中間都夾有松露醬!一啖放入口,真係幸福感滿瀉!豆腐十分嫩滑,雖然不太吃到豆腐原本的豆香,但松露醬的香味將整個菜的味道推到另一層次!

依家金價咁貴,塊金箔都唔止$45啦!!真係俾佢十個抵!!!所以得獎真係有佢的道理

(唔好意思,較左個白平衡,所以個色白左!

不消五分鐘,就已經滑入我的口中呀!

再來就是鮑汁鵝掌!鵝掌炆得十分入味,入口時微微一"算"即骨肉分離,我其實不嬲都好喜歡"算"腳趾,呢隻鵝掌都算係Jumbo size ! 食完一隻都真係唔多夠喉!

再來就又是另一得獎的名菜-龍皇披金甲!

淨係聽個名都夠照,霸氣十足!!唔知點解令我聯想起鞏利的滿地盡帶黃金甲,同一樣鞏利姐姐都咁爆!

魚肉跟蝦膠來一個Mix and Match, 再拿去炸,呢個Crossover的組合真係十個夾,蝦膠彈牙無比,炸到金黃色十分香口,只是我們兩個人食個份量又略為多了點,下次要來一個良朋歡眾宴,每人兩件就差不多!

呢個真係一個必必必食菜!

想將好味的甲再好味些,就要點晴了!用的就是他們的XO醬!

加少少即時提昇了好味度,帶點微辣,更能增加魚肉同蝦膠的鮮味!

食飯又點可以沒主食呢?是夜我們就點了一個魚湯米線,其實是一窩上,但當然貴為得獎餐廳,當然服務員會為你分好啦!一窩有3,4碗到啦!

我吃了一碗不加任何調味去感受一下魚湯的鮮甜味!那米線唔知點解可以滑到咁!我敢講呢碗係我食咁多魚湯最好味的一碗呀!

之後我加了少少辣油,同樣都很好味!從來我一食辣就會變孖潤腸咀,但依家幾經訓練,都好多了,但當然都唔可以太辣啦!如果唔係都一樣會出現呀!

最後就是壓軸出場的必食甜品,M先生知我喜歡吃甜品,雖然見我飽到上心口,但都堅持要叫,一來到,都冇咩特別,一打開個盒,就知咩事喇!!!!

呢個咁得意的甜品叫翅晶凝,其實似楊之甘露糕,先唔好講好唔好食,只係呢個排場咁出場,都十個型啦!飄出來的煙令人感到透心涼呀!

我都忍唔住當藝術品咁欣賞左幾分鐘,驚嘆廚師的心思!

話明係翅晶凝,一定要俾翅你呀!上面一層就是素翅,底就是芒果布甸,甜度恰到好處,為呢一餐劃上一個完美的句號呀!

是夜食了約八百多元,真是物有所值,過了很開心的一夜!我一定會再來試其他的菜式呀!

2,753 total views, 2 views today

About 王姬

成日都好鬼happy 既Mrs.T 說道:

我都去過明閣,不過我食完之後再一次覺得鬼佬根本無資格去評中國菜!
 
唔係話佢唔好食,咁既價錢,好食係應份既! 但係咪真係好食到值依個價錢呢? 個人好有保留~ 而且嚴格來講,我覺得根本唔算係正宗中菜,太fusion嘞!
 
 
[版主回覆06/15/2011 23:45:00]係呀~有時候佢地入圍的名單又真係會令人O咀,特別係去到亞洲的地方, 佢地評中國菜的標準又真係唔多唔少會受人質疑的!
可能明閣都真係唔算正宗的中菜 ,所以就受到佢地的歡迎呀!
價錢貴的話,對整餐的期望就會高些,因為付出左金錢就梗係要享受到好的食物,服務同環境, 整體來說明閣給我的感覺都不錯,間唔中食下都Ok o既~

Paul Li 說道:

  睇落好好味喎,但我應該唔寫得食咁貴。
[版主回覆06/15/2011 23:31:00]搵一個特別的日子,當獎勵一下自己去試下啦!

Scroll To Top