灣仔上樓上海菜 – 留園雅叙

早幾天M 先生帶我去左一間叫做食上海菜, 叫做留園雅叙, 唔知點解我一見到個名, 就聯想起慧研雅集

, 其實又一D都冇關, 都唔明點解自己會咁白痴架

一上到個門口, 好神秘~~~~ 睇唔到入係點,只係見到個門口出面有點亂, 擺哂雜物咁囉!

一推開個門就見到有呢個長長的bar 檯係正餐廳的中間, 周圍就是餐檯圍住, 大約得廿幾張檯, 但係真係估佢唔到, 係全場爆滿! 後來M 先生話佢有訂左位, 所以我地先有得食喳!我估我o個張都係最後o個張喇! 因為我地就係坐係門口喇!

留意到同場的客人大部份都飲紅酒

,可能係咁,個酒吧位都佔左好多個面積呀!

,

餐牌上印有一個留字logo, 簡單得黎帶點高貴的型格!

呢個餐巾真係摺得好有心機! 好少見到中菜都會摺得咁靚!不過又咁講, 全場都係得廿幾張檯, 但係眼見起碼都有八九個侍應, 係呢個現今的餐廳, 好少見到有咁高的檯對侍應比例呀! 一個侍應對兩張檯, 真係要老店自做到!

第一味就是"老"蛋喇!!個賣相都不俗, 係溏心蛋! 不過味道略淡, 我地食左半隻後來都加左少少胡椒粉吊下個味, 全程都係M先生叫, 我冇睇價錢, 事後佢話我知好似要成$38隻! 嘩! 都真係幾貴呀!

呢個時候想起Mrs.T, 佢某一次介紹點整溏心蛋, 仲用玫瑰花煙燻, 我諗佢整o個個仲好味呀!

酸辣湯味道一般, 好似沒有什麼大的印象

食上海野有一樣野係的必食的! 就是銀絲卷, 不論係蒸或者係炸, 總之都要有一條! 點解一定要有? 個原因我都唔係好知, 不過對於這些白濛濛咩都冇的麵包,我真係有點情意結, 總食到佢地的香甜味, 個感覺好溫暖 (唔通我前一世係一個苦行僧!?)

呢個銀絲卷俾人泵扁左, 但仍然都食到佢淡淡的香甜味!

有冇人可以話我知, 其實銀絲卷同饅頭用的料都係一樣, 分別其實只係在於銀絲卷入面係一絲絲, 而饅頭係實心?係喎,真係食就識,查實又真係唔知點解可以整到入面係一絲絲的呢?

再來就是小籠包!食小籠包其實又真係好有技巧,太熱時一口咬爆佢,你條脷真係多得你唔少,仲有熱到要吐番出黎,真係失禮哂呀!

放到凍哂時先食,我又總係覺得有一少少腥味(我真係試過幾次)

好似名人教係個頂啜左入面的湯汁先,我又覺得咁會失左個原本的意義,因為應該係一齊入口先會感受到那湯怎樣帶出加強左肉的鮮味!

所以我通常都會黎到放一陣,先係頂啜一啜,感受一下個心的溫度,可接受的話,就成個放入口,太熱又放低等多陣咁呀!

回說呢個小籠包,湯汁夠多夠鮮,沒有很油的感覺,皮亦夠薄,一口一粒,真係過足哂癮!

最後出場就係呢味炒河蝦!個玻璃汁做得幾好,咸淡適中!

唔好睇小呢碟野!M先生叫我估下呢碟野幾多錢,我起初見呢碟蝦毛仔仲要係咩都冇加入去炒,我就估佢$88

點知佢同我講,原來係要成二百幾蚑!!!

事後我地檢討過呢碟野,真係唔知佢貴的價值係邊,味道同一般的蝦仁都冇咩分別,肉質又唔係十個彈牙

最終我地都得出一個結論,一定就係心機錢呀!!要一隻一隻剝殼,仲要挑腸,呢啖心機真係值錢呀!

黎一個近鏡睇下!

到最後M先生有點意猶未盡,於是點多了一個炸醬麵

呢個炸醬麵同我地成日係雲吞麵鋪食那個不同,呢個好似台灣的"肉燥"味,再加上青嫩的青瓜,為呢一餐劃上完美的句號!

雖然話女人有第二個胃係食甜品,但係今次都真係食唔落喇!

我地下次都會再黎呀!不過就唔會叫那個河蝦,因為佢拉高哂張單的價錢,埋單要四百多元,所以下次一定會飛起佢!

2,826 total views, 1 views today

Paul Li表示:

感覺好 high class,一定好味!
[版主回覆07/08/2011 00:06:00]環境同感覺都不俗, 而且都幾好味, 所以都會再去食過, 又試下新野!

YouU表示:

heyhey!! 來去匆匆的粉絲碎 留下口水沬支持一下先
[版主回覆07/08/2011 00:04:00]You, 多謝你的口水尾支持