一次過滿足你須要的人氣茶餐廳 – 旺角民華餐廳

某日相約住在旺角的好友K小姐來一個血拼(先自聲明, 我除了血拼還有很多其他的愛好), 由於要來一個速食, 我們就選了這間新登場一陣子的新派茶記 – 民華餐廳

但見門外都人頭湧湧, 雖然想爭取時間, 但為了一試新野, 即管俾佢十分鐘時間 !!十分鐘應該點都有得入!

(留意下下面呢個哥哥仔, 大熱天時仲帶冷帽, 真係見到都熱呀!!!)

當然趁等的時間要研究一下個餐牌, 講到明咩都有得食, 茶記必備的當然是茶餐!由一開門7點開始供應到淩晨十二點半,時常去到某一些茶記都冇得食茶餐,佢地真的做得太好了!! (如果可以早上活動可以慳番4蚊來試它的茶餐!!)

茶餐的款式百搭得很, A+B+C , 多士唔駛加錢, 是我呢個多士怪的大喜訊

不嬲都好少選通粉作茶餐的粉麵, 但佢清一色係通粉,點都要俾個面試下, 仲有我的最愛蕃茄湯底

 

另一樣吸引我的就是一粒粒的西多士, 間唔中我都會準許自己開心的食一客,氹下自己開心

飲茶的點心係我的喜愛排名榜佔低的位置,如果要食我都去酒樓啦!不過, 其實佢都有佢的存在價值, 因為試想下一家大細, 好多時個男人特別鍾意飲茶食點心, 一盅兩件, 個阿媽就冇咩意見聽個老公講, 做仔女的多數都鍾意食茶記做早餐, 呢個時候, 茶記有點心的出現就減少了好多家庭糾紛案的出現了!

因為阿爸有阿爸叫, 個仔女有個仔女叫, even一齊叫點心, 都可以整番杯奶茶咖啡提神!幾好!!

另一樣就係雲南米線, 有成二十款,分分鐘多過譚仔!! 不過好唔好食就唔知, 遲些有機會先再試,因為我的首選都是茶餐!(去茶記當然緊係要試茶餐先啦!!)

我果然料事如神, 流量極快, 十分鐘有得入!

但位置都很迫, 而且感覺有點污糟,不知是否因為流量實在太快,來不及清潔,檯都好似掃唔乾淨

我的茶餐很快有得吃! 塊午餐肉好似薄左少少

蛋炒得夠香滑, 但不及澳洲牛奶公司

最欣賞就是那塊多士, 烘得香脆金黃色, 有heart 的表現, 我多士怪絕對收貨! 烘得好過很多加了錢, 黎到仲要我說" 唔該, 我叫左烘底架喎" 的茶記

一睇個蕃茄湯底好似好濃

仲有豬潤, 滿心歡喜一食, 個味都是太淡了~~俾佢的顏色呃左

K 小姐的粒粒西多士, 是我幫佢揸主意叫的, 因為我想試!

個哥哥問我小姐西多係唔係食奶, 心諗, 食奶??真係未試過喎!

當下都冇諗又冇理K 小姐就話好呀!(笑)

我以為佢的粒粒多士會係切好左再去炸, 咁四邊都會係炸過,會好味好多, 一拮上手, 就知我又諗多左

整體來說這西多下次都不會再叫, 因為炸得不夠香脆,林林的, 再索哂油同奶, 好"漏", 吃一兩粒個胃都俾埋佢! 好彩小妹有上天的眷顧, 加上K小姐大人有大量沒有降罪於小妹, 否則真的是人頭落地

地址: 旺角通菜街153-159號地舖

2,821 total views, 2 views today

YouU表示:

西多同平時果d有分別嗎  好失望呢
[版主回覆05/19/2011 22:48:00]可能我的期望好大, 所以就比較失望呀~
都有唔同呀!就係冇平日食的那些炸咁香呀!!
可能我鍾意食燶野呀!哈哈!見到呢D唔夠燶的就會有D唔高興咁囉!哈哈

成日都好鬼happy 既Mrs.T表示:

咁果時佢地啱啱開張,準備 + 經驗不足,唔熟運作……都情有可原既! 果時我去食野都唔會爆棚,而家爆棚一定有佢既原因嘛~
 
 
[版主回覆05/19/2011 22:41:00]哈哈~~咁都係呀!!所以可能係咁我都係近排先留意到佢係Open rice 有人講呀~ 我好多時經過都見到有人排架~
我最開心就係佢幾多點都有茶餐, 幾時都可以食, 同類茶記好似翠華呢D就冇喇~
你下次番黎一於去試下啦!
 

成日都好鬼happy 既Mrs.T表示:

依間野我聖誕返香港時已經試過~
 
果時佢地啱啱開張,食物選擇好少 + d服務超唔掂!  一杯凍檸茶催單4、5次都未來,又計錯數又盛……
 
不過而家睇門口個餐牌好似多咗好多野食! 下次返香港我會再試!
 
 
[版主回覆05/17/2011 00:47:00]很開心見到你的留言呀!! 咁原來呢間野聖誕的時候都開左架喇, 我都唔知, 我只係見佢有一輪係open rice 個排名升得好勁, 所以一路都記住行開就要黎試下呀!
嘩!咁佢俾你第一個印象真係唔係太好呀!! 呢間野仲我最大的印象就係迫呀! 仲要係好鬼迫, 食完就要即撇~
你真係好呀! 俾多次機會佢呀! 你多數都係一年番一次香港?